Ditaba Di eme Ditsetsepa

Ditaba di eme ditsetsepa ke puku ye e ngwaletšwego go hlahla le go lokišetša barutwana bao ba lebanwego ke go tlo ithuta mehuta ya dingwalo dithutong tša bona. Pukung ye, barutwana ba tla lemoga le go ithuta mehuta ya Dinonwane, Dikanegelokopana, Direto gammogo le Terama goba yona Papadi /Poledišano. Ka boripana barutwana ba tla ithuta tše:

Nonwane ke mohuta wa dingwalotšhaba. Nonwane ke mohuta wa kanegelo ya molomo. Le lehono le, ga go motho yoo a tsebago gore motlhami wa dinonwane ke mang. Nonwane e fetišetšwa melokong yeo e latelago ka go bolela.

Kanegelokopana ke kanegelo ye nyenyane. Baanegwa ba kanegelokopana ga se ba bantši. Gantši ga ba fete ba bahlano. Moanegwamogolo ke o tee. Ditaba tša kanegelokopana di dikologa godimo ga gagwe. Molaetša wa kanegelokopana le wona o fela o le o tee.

Theto ke polelo ya go tšwa pelong goba maikutlong a moreti. Ka sereto moreti o hlaloša ditaba. Moreti ga a anege ditaba go etša ge moanegi a dira bjalo mehuteng ye mengwe ya dingwalo. Barutwana ba tla ithuta ba lemoga gore go na le mehuta yeo e fapanego ya direto.

Terama ke mohuta wa sengwalo seo poledišano e kgathago tema ye kgolo kudu sengwalong. Dimelo tša baanegwa di tšweletšwa gabotse ke dipolelo tša bona baanegwa ka go fapana ga bona.