Mokoko Wa Lenala Sekopalematsuane

MOKOKO WA LENALA SEKOPA LE MATSUANE ke padi ya Sesotho sa Leboa ye e ngwaletšwego go ruta le go tloša babadi boduto. Boikanyo mosetsana wa sekolo se se phagamego sa Temeng, o rile go hwetšwa a rekgetlha sethokgweng sa kgauswi ga sekolo, ba lekgotlataola la sekolo ba thwala moletadikgoro yo mongwe gape gore tshireletšego ya barutwana e matlafatšwe.

Kotsi yeo ya go wela Boikanyo e ile ya tsoša dihlabi tša maloba go basadi bao ba kilego ba amega goba ba phonyokga yona kotsi ya go phaiwa thetho ka kgang. Gwa tloga go itaetša gabotse gore tshotlo ya bana le basadi ka go alamelwa ka kgang e tsene fase ruri e tloga e epa molete wa nkoti, wo o gohlometšago dipelo tša batšwasehlabelo.

Moletadikgoro Tshotlego Moralla wa go tšwa nageng ya Lesotho o ile a itaetša e le moletadikgoro wa mmapaale mathomong. Ga se go tšee nako ye telele pele a tamoga pelo ka lebaka la mosetsana yo a bego a bitšwa Rosa gona fao sekolong. Le ge ya bona tema e be e se ya hlwa e wela mabapi le tša lerato, semenogana se ile sa direga ge go utuloga gore tatago Rosa o lla sello sa sehlodimare ge a ipelaetša mabapi le maitshwaro a Moralla. Nnete ya taba ke gore Tatago Rosa ka Sebele, go thwe ke yena a bego a kile a alamela morwedi yoo wa gagwe a ba a mo roba leoto.