Makgoma A Dihlong

MAKGOMA A DIHLONG ke terama yeo e kgwathago kudu melao ye rena batho re felago re e bea makgotlaneng a metse ya rena re le badudi. Ye mengwe ya melao yeo re ipeelago yona, ebile nke re e bea re tletše pelo, e fela e fetoga mapheko tšwelopeleng ya bophelo bja setšhaba ka kakaretšo. Bangwe bao ba bonago dilo ka leihlo le lengwe, ba nape ba šomiši yona melao yeo bjalo ka sehlare sa modikela ge ba dira dilo tša phaku. Sehlophana sa barutwana sekolongphagame sa Ntshabohloko ba be ba thinya sekolo gantši fao go ilego gwa belaetša barutiši. Barutwana ba napa ba šupa ka monwana melao ye mengwe ya motse wa gabobona wa Moditelong. Barutwana ba bolela gore ba gapeletšega go bapola seila ka Labone le gona go ya molemong ka Labohlano ge go ena le poloko ya mongwe motho mo motseng. Barutwana ba bolela gore seo ba se dira e le go emela malapa a gabobona ka gore ge ba ka se dire bjalo, mohla e le ka gabobona ba tlo hloka bathekgi.

Ketelo ya hlogo ya sekolo kua kgorong ya mošate e tšweletša nyanyeng melawana yeo ya go ipeelwa ke baetapele ba makgotla a go fapana mo motseng. Se se dira gore setšhaba se bulege mahlo se be se loge maano a go hwetša dithušo mabapi le go efoga mathata a go hlolwa ke go ithweša ka letolo mešomong ya setšhaba. Ona mathata ao ebilego a dira gore bangwe ba ipaletšane le bana e le barutwana sekolong. Tebeleloleswa ya melao ya taolo sekolong sa Ntšhabohloko morago ga kgetholeswa ya Lekgotlataolo la sekolo, le yona e dira gore molao o phethagatšwe gomme bao ba tšwago tseleng ka mokgwa ofe goba ofe ba otlwe ka mokgwa wa maleba wa semolao.