Tlala Ke Sera

Bothata bjo bogolo bo thomile ge dikgomo tša gaboMahomolele di hlakana le tša gaboKgantšhi mesong e mengwe kua madišong. Kgantšhi a kgeregela Mahomolele ka mahlapa a go ferola dibete, a mmotša go re a se kopanye dikgomo tša gagwe le tša gabo ka gore tša gaboMahomolele ke mekapane di otile kudu, ebile di na le makudula le dikgofa.

Kgantšhi o ile a tšwela pele go hlakiša Mahomolele le gona kua sekolong. O be a botša barutwana ba bangwe ba sekolo go re ba se theetše Mahomolele ge a bolela ka gore ke ngwana wa modidi. Taba ye e ile ya thoma go tshwenya Mahomolele kudu maikutlong le mogopolong, efela ka gore o be a sa rate go bolela kudu, a no ikhomolela.

Batswadi ba Mahomolele kua gae ba be ba sa tsebe selo ka taba ye. Ba bangwe ba barutwana ba sekolo ba lekile go loma barutiši tsebe ka taba ye efela barutiši ba se e ele tlhoko ka pela. Gape taba ye ke yona e bitšwago Bulling ka polelo ya Sejahlapi. Barutwana ba bantši ba šitilwe ke go fetša dikolo ka lebaka la go tlaišwa ke ba bangwe dikolong.

Ee, go bjalo!