Marapo a boRakgolokhukhu

Marapo a borakgolokhukhu ke puku ya padi ye e nonnego ka botsebelo le ditumelo tša setšo sa Bathobaso nakong ya bogologolo. Go ya ka tumelo ya bana ba mmala wa sebilo, ke hlobaboroko ge o mongwe wa leloko a ka hlokofala gomme a se tsebege mo a bolokilwego gona. E tla re ge ditoro tša go hlobaetša le ditiragalo tša go makatša di direga bophelong, gwa nama gwa belaelwa gore badimo ba eme ka maoto.

Go be go kile gwa re mola bogologolo setšhaba sa Banareng bao ba anago nare kgomo ya naga, ba lwa le Baanatlou ba go bina tlou. Baanatlou ba fentše madira a Banareng ntweng gomme ba boloka ditopo tša bona fao go bitšwago lengopeng la Matleisane. Baanatlou ba ile ba dira taba yeo sephiri le ge ditlogolo tša Banareng di be di kgopela gore ba ba laetše lefelo leo. Se se ile sa fetoša Banareng le Baanatlou manaba a go hlolana ka diolo nako ye telele.

Mafelelong Banareng ba gaKgoši Kgomo’a Mankhumiše ba ile ba loga maano gomme ba hwetša lefelo leo ka thušo ya mathopša a Baanatlou ba gaKgoši Mangako’a Mothemela. Mathopša a be a thopilwe ke Banareng ntweng ya go lwa le Baanatlou ya kgaphamadi.